ملامح صبح

طعم وصله

شعر: بنت ابوها

قد لـي ثـلاث أيــام مارقت مـارقـت
كل ماطرالي (طعم وصله) فهقته
إشتقت..إيـه إشتقت..وإشتقت..وإشتـقـت
ولا عنّ قافٍ صوب ريحه طرقته

للحيـن أنـا مـن طعـم حبـه فلا فـقـت
ماهوب أحبه والله إني عشقتـه
لاجيـت أسـج شـوي عـنـه وبـرقـت
أونس بصدري طعم لجّـة فشقته

أنـا وقلـبـي يــم صـوتـه تسابـقـت
مدري سبقني القلب وإلا سبقتـه
بـس الـوكـاد إنــي بقلـبـه تعلـقـت
إلا الوكاد إن أعذب الوقت وقته

عـلــى النقا..لاخنت..لابعـت..لابـقـت
إلا غـلاه إن ماعطانيـه بقتـه
ليتـه يعـرف المسألـه مسـألـة وقــت
ماهوب موضوعٍ يوقع ورقتـه

أصل الغلا إحسـاس لـو سقـت ماسقـت
مايمكن إنك تشعـره ماشهقتـه
وإلا شعـرت إنــك بعشـقـه تطـوقـت
يلذ لـك قلبـك إذا بـه حرقتـه

ولاأقبل عليـك وقمـت ترجـف وعرقـت
إذكر قليبك وإعرف إنك لحقتـه
وأنــا إلامـنـه طـرالــي تعـانـقـت
مع النجـوم ولذ لـي ماعنقتـه

ولاغـاب مثـل الحين..مارقت..مـارقـت
يعودلي طاريـه لامـن فهقـتـــــــــــــه

اترك تعليقاً

لن يتم نشر عنوان بريدك الإلكتروني.