شعر: حميدي الثقفي
يارب هذا الطريق افعى تفـح وعتمـة اعشـاب
ظلمه وطين وبلل وعظـام نـاس امـوات حيـه
الليل غابة ونبض انفاس صـدري فـاس حطّـاب
تستنبت النـار فاكهـة الشتـا شمـس ابجديّـه
من سلّة الريح من غيـم الصـدف لابلـل ثيـاب
من رجفة اللـون مـن تفّاحـة البـرد الشهيـه
والشارع الصمت نهر اسود من المطـاط جلبـاب
يقرا صـدى خطـوة العابـر ملامـح سرمديـه
ياموت وبيوت حارتنـا علـب سرديـن وتـراب
تـرى التعـدّي لغيـر اوّل قرابيـنـك زريــه
الريح تصفر وينعـق طيـر بـوم وتنبـح كـلاب
ويضـج صمـت المدينـة كلنـا نـذر المنـيـه
قلت المدينه تثاوب في وهـن ونعـاس الابـواب
والناس من غيـر تلقـي بـال تلقـي بالتحيّـه
ابسألـك صاحبـي خايـف ومتـردد ومـرتـاب
كم من سؤال يمـوت وينولـد ويمـوت فيـه ؟
هذا الحذر والتوجّس في الملامح مالـه اسبـاب
هذا الترقـب وهـذا الريـب والخـوف المعيّـه
الصبر طبع الجمل طيّب عرفنـا سـر الاعجـاب
هذا الوفا في الكـلاب الوافيـة طبـع وسجيّـه!!
ابسألك صاحبي واقسى كمـا يقسـون الاحبـاب
وجهك هو القاتل المقتول مـن فيـك الضحيّـه ؟
عمرك مجرّد زمن تافه غبي جـوف الزمـن ذاب
من منبع الليل الـى صبـح المصبّـات القصيـه
للجوع مخلاب من قال ان ماللجـوع مخـلاب ؟
لا في الثـرى ضاجعتـك ولاارضعتـك الرازقيـه
ياحكمة الطيش ليش نخلـد الاسمـا والالقـاب ؟
مايمكن اسم الورود اشواك واسم الشمـس فيـه
لو للغموض المبيـن وللبيـان الغامـض كتـاب
محـدٍ بقـى لـي عليـه ولابقـى لاحـدٍ عليّـه
عرفتني كنت انا صاحبك واصحابك لـي اصحـاب
امـد لمصافحـك يـدّي تصافحـنـي يـديـه ؟
ابسألك عن ملامح وجه طفلٍ في القـرى غـاب
غيّبت .. والا القرى ياطفـل غابـت فيـك هيـه
قلت القرى واجهشت لك في البلاد رعوش الاعناب
والمشمش المسقوي واغصـان لـوزه عثريّـه
والما تقول بـكظايمها زبرجد فـي المـدى راب
والعشـب مجـدول بخيـوط الصباحـات النديـه
ابسألك صاحبي غمّـض عليهـا جفـن واهـداب
ياما لصبح القرى مـن وشوشـات المـا هنيـه
