ملامح صبح

أطلال

شعر: ضمن السناني
يمخر عباب الليل هاجوس ن طرى
في غبة الأشواق وأمــــواج الحنين
مده وله لو كان جــــــــزره مابرى
مابين وصل وصــــــــد تيار السنين
لا هب شرو الشوق عن قاعه درى
وين المحـــــار اللي به الدر الثمين
يرسي على سيف الهوى فوق الشرى
لو إن حرزه فالهـــــوى حرز ن مكين
لا ذعذغ الغربي على صوته جرى
دمع العنا لا شك مـــــــــــاباح الكنين
ولالاح نـــــــور البدر في ليله سرى
لأطلال فيها مر وضــــــــــاح الجبين
اللي بنوره يشـــــــــــعل الليل وذرى
لامال غصـــــــــن البان في رقه ولين
حرك غصون الشوق ويطير الكرى
وأجني من عذوق السهر ذكراه لين
بلل سواد الليل صمته والثرى
خضب ثراه وفاح ورد الياسمين
عبق الوداع و ماعلى الدنيا ورى
ويتل مياح الهوى حبل ن وتين
وسط الضلوع اللي تصافق فالعرى
قُرب السواني تجذب الدمع الحزين
عليك ياللي من ورا طلعة كرى
غايب ثلاث سنين والله لي يعين
حالي براه البعد وانته لم ترى
كيف الهوى سوى بحال العاشقين
واليوم جرحي والوله فيك اخشرى
تطري على الهاجوس والخافي يبين

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *